Jahresbericht J+S PowerKids 2015/2016

Nachdem miär eis Jahr Paisä gha hend oder besser gseit, will kei Kurs stattgfundä hed, hemmer nu einisch ä Alaif gnu und ghofft, dass PowerKids am Läbä bleybid. Nateyrlich hemmer eys uberleid wieso, dass pletzlich kei Chind meh sind go turnä und hend eys de entschlossä, dass miär, we diä andärä Riege, bereits nach dä Summerferiä diänd startä. Vorhär hend PowerKids erst nach dä Herbstferiä gstartät. Was sich nid gändäräd hed isch, dass PowerKids a Ostärä uifherid.

Ja und siehe da, äs sind wieder Chind cho turnä und im letschtä Jahr simmer im Schnitt regumässig um diä 10 bis 13 Chind gsi. D Durchmischig vo Buäbä und Meitli hätt nid chennä besser sey und so heds Turnä wieder afä Spass machä.

I eysnä Turnä stahd vor allem Bewegig mit viu Spiel und Spass im Vordergrund. Meistens isch äs eysäs Ziel us Leitär, dass d Chind nach äm Turnä uf dä Schnorä sind und dä heimä guät schlafid. Aber ai koordinative Elemänt und Konzentration darf nid fählä. Das isch mängisch nu schwierig will d Chind fir das wenig Inträssi zeigit und doch gherds däzuä. Da bruichts houd wieder einisch äs Machtwort vo eys Leitär.

Im letschtä Jahr hättid miär gärn nu zwei Abigä im Winter wellä veruisä gah, entweder go Schneeschuälaifä oder go schlittlä. Das isch de leider us Schneemangu neyd wordä und am Ändi vom Turnerjahr gemmer eigentlich go Minigoufä, doch ai da heds eys das Jahr nid wellä glingä. So hemmer de entschiedä, dass miär nach äm letschtä Turnä eifach is Happy sind go Chicken Nuggets mit Pommes Frites ässä.

Ä grossä Dank mecht ich meynä Leiterkameradä Ambros und Luki uisrichtä. Miär hends amig irgendwiä gschaft, d Turnä chennä z organisiere und z leitä.

Dä Chind gfouds im Turnä und miär hoffid nateyrlich, dass sich neywi Leitär fir d PowerKids gfindä lend, will s Leiterteam am Ändi vo dem Turnerjahr 2016/2017 uifherä wird. Bi derä Glägäheit mechtid miär ai dä Barbara dankä. Sie hed us neywi Verantwortlichi Kids-Riegänä eys noch begleität und informiert. Äbäfous gherd im Vorstand äs Dankäschen fir ouäs wo sie machid.

Fir d J+S PowerKids

Wouti Niederberger