Damenriege Jahresbericht2016-12-16T23:11:42+00:00

Jahresbericht Damenriege 2016

Turngeschehen

Am Afang äs paar Bilder us de Turnhalle.

Statistik

37 mal hemmer eys zum Turne oder zumene andere Alass troffe. Durchschnittlich sind a denä Aktivitäte 16 Turnerinne awesend gsi. D‘ Erika hed keis einzigs mal gfählt.

Vereinsmeisterschaft

Je a eim Abig im Oktober, Novämber, März und April isch Vereinsmeisterschaft uf em Programm gschtande. Wie immer gid’s eis Schtreychresultat und drey Diszipline zellid fir d’Rangierig.

Klaushock

Am Chlaushock vum 30.11.2015 hemmer beschlosche, dass mr dr Uisflug per Drahtesel plane tiend.

Schneeschuhlaufen

Nachere churze Fahrt uf Oberrickebach fiehrt eys, am Abig vum 18. Januar 2016, ä wunderbari Schneeschuehtuir vum Fell über Furried, Alpbode, Chrüzegg, Spis zrugg zum Fell.

Fondue Essen

Am Dunschtig nach em Äschilimidwuch (11.02.2016) gads scho widr obsi uf Oberrickebach. Dermal i Poscht zum Fondue ässä.

Schnuizkasse-Ässe

S’Schnuzikasse-Ässe, 16. Mai 2016, organisiert vu de Brigitte und de Moni, startet z’Ängubärg bi de Bänklialp. Z’Fuess gahds obsi i Gerschnialp zu Fondue-Chinoise. S’isch niemer truirig gsi, dass die grosse Schneeflocke während em Ässe und nid uf em Heiwäg gfalle sind.

Turnfest

Bepackt mit Sporttäsche, Ruck- und Schlafsack reist am 11. Juni 2016 äs gmischts TV-Grüppli is Suhretal. Chuim im Fäschtzält acho schiffeds, was abe mag. Was suscht nu alles passiert isch am Turnfäscht z’Trienge, cha em Jahrespricht vu de Männerriege entnoh wärde. Abr eis wetti ai hiä feschthalte, as isch usinnig scheen gsi.

Vereinsmeisterschaft Absenden

Am 4. Juli 2016 bi schönschtem Wätter aber chle durzogner (Gülle) Luft hemmer de Grill vu de Uli i Beschlag gnu und s’Absände vu de Vereinsmeischterschaft abghalte. Gwunne hed, einisch meh, d’Elsbeth. Anni und Rita (Wolfeschiesse) hend die Zweit- und Drittplatzierte gheisse.

Flyer-Velotour

Am 27. Aiguscht, am zäh ab sibni reisid 9 Turnerinne mid em Zug uf Willisau. Flyer-E-Bike fasse und per Pedal gahds uf de Härzroute nach Zug. Heissi Temperature hend eys äs gwächlichs Tempo la anäh. Nid emal s’Bad im Zugersee hed für Abchüehlig gsorgd. Drfir hemmr chennä bis tief id Nacht i dr Gartewirtschaft hocke, bevor mr i dr Jugendherbärg id Fädärä gsunke sind. Am Sunntig radlid mier müehelos obsi ufä Zugerbärg und witer über Ägeri und Rothethurm uf Einsiedle. Gschnell gu Holebänze chrämle, d’Velo abgäh und de gahds mid em Zug scho widr heiwärts.

Turnerabend

Muisig uissueche, Tenü beschtimme, Stoffverbruich berächne, Schnittmuschter zeichne, Choreografiä zämeschtellä undsoweyter. Regelmässig hemr im letschtä Jahr de Hula-Hoop-Reif la tanze und ei Teil umenander igüebt. De Turnerabig hed lang vor de Summerferiä agfange und isch am Mändig, 22. Auguscht 2016, mid em erschtä Training so richtig lansiert wordä. Insgesamt 17 Turnerinne und 6 Turner hend sich i de nächschte 9 Wuchä uf 3 Bühnevorfüehrige vorbereitet.

Am 24. Oktober isch de Startschuss für d’Intensivwuchä Turnerabig gfalle. Stellprob, Irichte, Hauptprobe und die zwe Turnerabig hemmer bi üsem wisseschaftliche Exkurs bewältiged, bevors am 30. Oktober scho wieder as Ufrume gange isch. Mey härzlichschte Dank ghert de unzählig vile hälfende Händ und mitdänkende Chepf, wo drfir gsorgt hend, dass dr Turnerabig zu somene Erfolg worde isch.

Dankeschön

…em Vorschtand, de Leiterinne, de Turnerinne und Turner vu de Dame- und Männerriege fir eychi Zeyt und Understitzig. Hit beschliessid mier äs arbeds-intensivs tolls Turnjahr Es hed viel Spass gmacht und es isch mer ä grossi Fräyd gsi, mid eych uf de Bühni z’schtah

Anhang

So, das ischr jetz auso gsi, mey 25. und letschti Jahresbricht vu de Dameriege. Mid em hütige Tag übergib ich d’Hauptriegeleitig de Rita Niederberger, Wolfeschiesse. Jedäs Tschöpli hed seys Bürdeli, aber au sini schönä Verpflichtigä. Zu letschtära hend für mich immr diä bsunderige Aläss ghört. Nid wills weniger z’tue gäh hättid, im Gägeteil, will sie ä bsundrige Uisäforderig gsi sind. Das hed für mich de Reiz uisgmacht. Ä sonä Uisäforderig isch sichr s’Turnfäscht vu 1993 in St. Moritz gsi, womr mit de Gymnastik Pflicht modern, em Fachtescht Allraund und de Pändelstafette, serscht mal de dreyteilig Vereinswettkampf beschtritte hend. Später hend ier Fraiä eych sogar a Schuelstufebarre gwagt. Mit dem simmr zwar nie anes Turnfäscht, aber zäme mit den Gymnastik, 1995 und 1996 im Vereinscup LU/OW/NW gschtarted. Bsunderigi Uisäforderige sind ai all die Bühneproduktione oder d’Uifgabe im rote-Fade-Team für mittlerweylä etlichi Turnerabigee gsi. Da hed meys innere Feyr so richtig afä lodärä. Wer dänkt, das heig ich aues mid links usem Ärmel gschüttled, teyscht sich. Oft isches ä Chrampf gsi, äs uishalte, äs nächtelangs hirne, aber ai schpannend und immer han ich uf eych Fraia chennä zellä. Ier hend i denä 25 Jahr äbefaus viu Zeyt i Turnverein, i Dameriege investiert. Dankä viumal.

Bleybid dra, ziehnd eych nid i Komfortzone zrugg, lend eych immr wiedr la uisefordere – forderid eych ai sälbr immr wiedr uisä. Das winsch ich eych aune, nid nur de Dameriege-Fraiä.

Priska Christen